18 наурыз күнi Көкшетау қаласының мәдениет және тiлдердi дамыту бөлiмi Ұлыстың ұлы күнi Наурыз мейрамына орай мемлекеттiк тiлiмiздi ұлттық мәдениетiмiздi, салт-дәстүрiмiздi насихаттау мақсатында «Елiме шуақ сыйлаған әз Наурыз» акциясын өткiздi.
Аталған акция қалалық №10, №12 жолаушылар тасымалдау автобустарында жүргiзiлдi. Автобус жолаушыларына, қала тұрғындарына қалалық мәдениет бөлiмiнiң қызметкерлерi Наурыз мейрамына және қазақ халқының салт-дәстүрлерiне байланысты сұрақтар қойып, акция барысында белсендi жауап берген қатысушыларға мерекелiк дорбаларға оралған қазақтың ұлттық тағамы-құрт, акция жазуы бар шарлар мен мерекелiк латын графикасында жазылған күнтiзбелер таратылды.
Қала тұрғындары зор ықыласпен акцияға қатысып, қатысушылар мерекелiк көңiл-күйге бөлендi.
Ынтымағы жарасқан көп ұлтты елiмiздiң бiрлiгi нығая берсiн! Әрбiр шаңыраққа Қыдыр дарып, бақ қонсын! Келе жатқан Ұлыстың Ұлы күнi құтты болсын!
